大型遠足籌款活動「樂施毅行者」已經結束，唔講唔知，原來互聯網券商富途都有份參賽，連該行創辦人李華都有落場，佢就話，企業成長嘅路，就同毅行者差唔多，需要不懈嘅堅持同努力，仲要長期嘅鍛練，好希望將呢種精神傳揚開去，鼓勵下大家，未來公會都會繼續支持唔同公益活動。

據了解，富途上上下下總共派出13隊隊伍參加，仲改名叫做「毅行牛牛」，參賽表現亦確實幾「牛」，逾半富途代表隊伍獲得金融組別首20名名次，當中有隊更以16小時56分鐘嘅成績，攞咗金融組別第1名，總排名17位。

話時話，近期港股表現弱過藥煲，希望「毅行牛牛」嘅旺氣，可以分啲畀港股，變返做「牛市」。